Passava' o mmeglio 'e ll'anne
ncopp' a na seggia,
sultanto ll'uocchie nire,
nu paro d'uocchie fute,
parlavano' e na vita senza scopo.
'A scienza se fermava nanze 'o mmale,
nisciuno santo se muveva a ppena
e intanto' o tiempo passava,
struienno pure l'urdema speranza.
A notte che penziere!
Turmiente ca sul' isso canusceva!
Nemmeno 'o bbene 'e mamma
'o cunzulava,
manco ll' odio p' o pate
sempe mbriaco d'a matina a sera
'o smuveva d'a seggia!
Niente sciuglieva 'o nureco d'o male!
Fosse stato nu zuoppo, nu sciancato....
Invece era nu ciunco
cundannato pe sempe!
Po' chella sera... nu tuono... 'o terremoto!
Pe vvie 'a gente curreva,
strellanno appaurata
miez' e case cadute.
'O ciunco c'a vocca spalancata
cull'uocchie addeventate
comm' e pprete
s'astrigneva vicino 'a seggia a rrote,
'a sola forza ca le rimmaneva.
All'intrasatto aizanno 'e mmane ncielo
- Madonna salva tutte quante nuie!
Nun vide io sto' nchiuvato!
E dicenno accussì se sullevaie,
nu passo dopp' a n' ato
e se truvaie int'e bbraccia 'e mamma soia,
comme pe nu miraculo d'ammore !
.jpg)